Postby Neg Timid » Tue Apr 26, 2016 12:48 am
Bagay k'ap pase avèk Klass nan HMI la la-a se pa yon ti bagay piti li ye. Menm si ou ta vle fè kòm si ou pa wè, ou pa ka kouri pou enpak la; paske li plake nan figi w chak jou... Tout kote w pase se yon sèl pawòl k'ap pale: Klass, Klass, Klass !
Si se pou bèl albòm Zenglen mete yon trè bèl albòm deyò. E se menm jan an tou, gen yon pakèt lòt bèl albòm ki sòti. Se pa manti. Mwen ka konprann vrèman ke bon jan pwomosyon gen anpil pou wè avèk siksè nenpòt pwodwi. Men kesyon pou nou toujou poze tèt nou, èske piblik la apwouve l? Eske pwodwi a gou nan bouch piblik la? Yon mizisyen nan yon djaz gen dwa panse sa l vle; li gen tout dwa l pou l menm di tout mizik ki sou albòm djaz li ye a se hit. Tout sa pa vle di anyen toujou. Se ki sa piblik la li-menm li di nan sa? Se sa ki enpòtan. E lepli souvan, mizik yon mzisyen nan yon djaz konn panse ki pral fè hit la pa janm hit vre...
An nou pa bay tèt nou manti, Klass pa fòse piblik la achte CD l, ni fòse l al nan bal yo. Moun yo kontinye ap achte CD Klass la an mas kon sa, se paske yo jwenn dè bagay ki enterese yo ladan l. Yo kontinye pral nan bal Klass, se paske yo pran bòz nan pèfòmans live Klass yo. Li vin pa yon kesyon de sa m panse, sa yon animatè radyo panse, sa yon moun ki pa renmen Klass panse; se yon kesyon de sa piblik k'ap konsome pwodwi Klass la panse. Se piblik la ki pou apwouve w. Mwen pa bezwen konnen sa w panse de yon pwodwi ou gen deyò. Sa k enpòtan, èske piblik ki pral achte l la renmen l. Kidonk, si n'ap byen swiv, Klass kontinye ap dezapwouve anpil moun chak jou. Paske tout ti analiz tèt chat « abracadabrantesque » k'ap fèt yo pou sal Klass pa bouje opinyon mas piblik la pa menm pou yon milipwèl....
Ke w pran pòz ou pa wè, Klass ap ekri yon paj nan liv istwa HMI la ki poko janm ekri. Ou ka santi biznis la vin gen yon lòt espwa ki pa't la avan. Si w pase nan nenpòt boutik ki vann CD ou remake yon lòt anbyans. Ou pa tande twòp plenyen tankou lontan. Biznis la te mouri Klass resisite l. CD Klass la pote lajan lwaye a... Gen yon aktivite cho. Se kout fil ou tande k'ap fèt pou distribitè CD a pote plis CD vini, tèlman moun kontinye ap achte l tankou pate cho. Ki dènye fwa nou sonje sa fèt?
Lè m rive yon kote mwen eseye pa pale twòp, mwen pito jis renmen tande. Se kon sa pou aprann. Daprè jan m remake mas piblik la resevwa albòm Klass la kote m pase, se prèske tout mizik yo, yo renmen. Apa de « Il es Friday » ou jwenn kèk moun ki pa fin twò renmen, apre sa, moun ochwa pou y'ap deklare ki mizik yo pi renmen. E daprè mwen, « Il est Friday » la sou albòm lan pou yon rezon byen detèmine. Ou kwè nou janm imajine dega mizik sa-a ka fè nan yon festival? Al retande l epi panse sou sa ! Sitou lè w'ap tande groove maledve gita Pozo a, se vrèman yon bagay tèt chaje nèt... Kidonk, an gwo, daprè reyaksyon piblik la, pa sa X ou Z panse; Klass mete yon megahit albòm deyò... Chak grenn mizik sou CD a se yon bonm.
Alò, pou nou fè yon istwa long kout, pou yon lòt djaz sekwe Klass, ou bezwen yon albòm ki gen pou pi piti 10 mizik ki bon anpil sou li tankou pa Klass yo. Yon hit, 2 hit pa sifi pou bouje Klass m'ap gade la-a. Fòk ou ka rale mil (1000) ekèk moun dèyè w nan bal tankou jan Klass ap fè l nan moman an. Fòk albòm ou an ka vann osi byen ke jan pa Klass la ap vann la-a... Si se pa sa, ke nou vle ou pa, Klass ap genyen djaz de lane ankò. Epi y'ap kore l avèk CD de lane met sou li...
NT
Facebook/: Les Jean-Philippe
