Alon mwen menm sa ! Se espre m fè menm pou m te ka fè Joujou pale, pou tout moun ka wè klè jan l malonèt. Pa gen anyen li di la-a ke m pa't konnen li pa ta pral di. Li nòmal ke tout moun kanpe yon kote, men misye li menm li fè pal la tankou yon avèg, li pa bezwen konnen, se nan wayom King sèlman li rete. Ki lòt moun nou janm wè Joudre janm bay kredi isiya ke Arly? Pou li pa gen lòt gran mizisyen nan HMI la.
Mwen toujou di sa mwen menm, Arly se yon gwo mizisyen malgre mwen pa yon fanatik. Mwen fè misye konpliman anpil paske li devlope yon stil ke anpil moun renmen. Li gen anpil moun dèyè l jis pou stil sa-a. Men pandanstan, pou mwen, antan yon elèv ki te bon anpil nan devlope istwa lekòl, mwen panse enspirasyon mayestwo a manke devlope nan istwa l yo pou l chame lespri m... E si yon moun pa wè sa m'ap di a, ou plis ke anraje. Mwen toujou di sa, e se pa jodiya m'ap di sa.... Si gen yon mizisyen nan HMI la ki vrè King bouyon an, se Arly Larivière. Se pa bèl mizik li fè hit yo pa bèl; se pa gou yo pa gou nan zòrèy pou tande. Men si nou vle onèt avèk tèt nou, n'ap wè se menm istwa a li kontinye pwolonje; se avèk menm akò mizikal yo li sèvi pou l kontinye ba nou pi fò nan mizik li fè hit yo. Pou mwen menm, depi m tande youn se tankou m te tande tout... E se pa kapab Arly pa kapab mizikalman, pliske li wè fanatik malad li yo renmen bouyon rasi a kon sa, li kontinye ba yo l kon sa. Mwen tèlman wè mayestwo kapab, mwen vin swaf pou m ta eksplore talan l plis. Pou mwen, li manke fè m eksplore talan l. Mwen ta renmen li enpresyone m yon lòt fason, pran lòt riks, eksplore lòt teren... Fè hit avèk yon lòt istwa. Pa menm istwa n'ap tande tout tan an, yon nèg k'ap plenyen viktim anba yon fanm ki pa konprann li....Tandiske kè l ouvri byen gran pou l renmen...
Mwen wè nèg yo ap pale de bouyon, epi yo gen yon bouyon rasi lakay yo, yo paka wè sa. Mwen pa gen pwoblèm nou renmen bouyon nou an jan li ye. Men pa vin ap voye pwen sou lòt moun epi se lakay nou rechofaj la rete... Depi se kon sa n'ap fè l, m'ap dezapwouve n isiya.
Yo tèlman pa konprann mizik, yo paka fè diferans ant siyati yon djaz avèk yon mizik ki rechofe. Klass se yon djaz ki fenk parèt, yo fin soti yon premye albòm avèk yon son, yon siyati pou idantifye djaz la. Se tou nòmal nan lòt albòm k'ap fèt yo, menm siyati sa-a oblije repete pou zòrèy nou ka fè nou wè se Klass k'ap jwe. Se sa k fèt la-a. Si Richie pa fè, moun ki konnen t'ap wè Klass se yon djaz ki fenk parèt k'ap jwe byen, men ki san idantifikasyon. Se rezon sa-a ki fè anpil bon ti djaz sòti men yo pa janm rete. Epi tou, dezyèm albòm Klass la gen yon pakèt chanjman ki fèt nan fason enstriman yo jwe, mizik yo aranje yon lòt fason; enstriman ki te fè plis solo nan premye albòm lan ralanti, Richie bay lòt enstriman ekspoze tèt yo plis. Youn nan bagay ki pi klè sou dezyèm albòm Klass la, se travay ki fèt nan aranjman liy van an... Men li klè w'ap wè se menm Klass ki te jwe sou premye alòm lan k'ap jwe sou dezyèm lan.
Sèl ti bagay m'ap konseye Richie, li ta bon pou l bay lòt mizisyen nan djaz la yon ti chans pou omwen chak oubyen 2-3 nan yo vini avèk yon mizik, menm si li menm li ede yo nan aranjman Se yon fason pou l pa ekspoze tèt li twòp. Mwen panse 3-4 bon mizik nan men Richie sifi sou yon albòm....
NT
Neg Timid ou kab! Bon bagay.
